آیا صوفیہ آبادہوگئی

ثنا آغا خان

86برس بعد آیاصوفیہ میں نمازجمعہ اداہوتے ہوئے دیکھنا میرے نزدیک ایک سحرانگیز احساس ہے ،مسلمانوں کے دشمن یادرکھیں وہ اپنے مذموم منصوبوں سے اسلام اوراہل اسلام دونوں کوختم نہیں کرسکتے ۔میں سمجھتی ہو ں فلسطین ،بھارت،شام اوربرما کے اندرمسلمانوں کی نسل کشی کے پیچھے اسلام دشمن سوچ ہے ۔وہ قوتیں جواسلام کواپنے وجود کیلئے خطرہ سمجھتی ہیں انہوں نے مسلمانوں کیخلاف اتحاد کرلیا ہے۔دنیا بھر میں آئے روزمساجد اورمسلمانوں پرحملے ہوتے ہیں لیکن مغربی ملک آوازنہیں اٹھاتے ۔بھارتی انتہاپسندہندوﺅں کے ہاتھوں تاریخی بابری مسجدکی شہادت اوربعدازاں وہاں مندر بنانے کے فیصلے پر دنیا کی مقتدرقوتوں سمیت کسی مہذب ملک کااحتجاج منظرعام پرنہیں آیا اورنہ دنیا میں کوئی خاطرخواہ بحث ہوئی لیکن برادراسلامی ملک ترکی کے منتخب صدر طیب اردگان کی طرف سے آیا صوفیہ کی بحیثیت مسجد بحالی کے اعلان پر پوری دنیا بالخصوص مسیحی ملکوں میں صف ماتم بچھ گئی تھی تو دوسری طرف عالم اسلام میں جشن کاسماں تھا ،وہاں حالیہ نمازجمعہ اداکرنیوالے ترک مسلمانوں کاجوش وجذبہ قابل دیداورقابل رشک تھا۔ترک صدر طیب ارگان کاطرز سیاست ترکی ریاست کی آزادی ،خودمختاری اورخودداری کاغماز ہے،ترک صوفیا کی وفاﺅ ں اوردعاﺅں نے ترکی سے ملک کی کایا پلٹ دی ہے۔ ہاگیہ صوفیہ فتح ہونے تک مشرقی رومن سلطنت جسے بازنطینی سلطنت کا نہ صرف سب سے بڑا مذہبی مرکز تھا بلکہ بازنطینی سلطنت کے تمام اہم امور اسی عمارت سے چلائے جاتے تھے۔ اگر ارتغرل غازی ڈرامے میں کلیساوں کے کردار پر غور کریں تو معلوم ہوتا ہے کہ مسلمانوں کےخلاف جنگوں میں یہ کلیسا جاسوسی، مشاورتی مراکز کے ساتھ ساتھ فوج کیلئے نرسری کا کردار ادا کرتے تھے اور جنگوں کیلئے مالی معاونت کا اہم ذریعہ تھے۔ ہاگیہ صوفیہ یونانی زبان کے الفاظ ہیں جس کے معنی ہیں Holy Wisdom جسے ترکوں نے آیا صوفیہ کا نام دیا اس کے تاریخی پس منظر پہ نگاہ ڈالیں تو اسے 360ءمیں قسطنطین نے لکڑی سے بنوایا تھا جو چھٹی صدی میں جل گیا تو قیصر جسٹینین اوّل نے 532ءمیں ہاگیہ صوفیہ کو پختہ اور عالیشان عمارت بنوانا شروع کیا جس کی تکمیل میں چھ سال لگے اور روایت میں ملتا ہے کہ تکمیل کے بعد جب جسٹینین پہلی بار اس میں داخل ہوا تو اس نے تکبرانہ و گستاخانہ جملہ کہا ”سلیمانؑ میں تم پر سبقت لے گیا” اس کے بعد تقریباً ہزار برس تک یہ عمارت آرتھوڈوکس عیسائیت کا مرکز بنی رہی اور آخری بار 28 مئی 1453 کو مسیحیوں نے اس میں مذہبی رسومات ادا کیں، اگلے روز سلطان محمد دوئم فاتحانہ اس میں داخل ہوا جو اس لمحے سے پہلے تک رومن سلطنت کے تاج و تخت کی علامت کے طور پر دیکھی جاتی تھی۔ اس کی اہمیت کا اندازہ اس بات سے لگایا جاسکتا ہے کہ مسلسل آٹھ سو سال تک مسلمان قسطنطنیہ فتح کرنے کیلئے لشکر کشی کرتے رہے لیکن یہ سعادت عثمانی سلطان محمد فاتح کو نصیب ہوئی جس کے لیے آپ صلی اللہ علیہ وآلہ وسلم نے فرمایا تھا کہ ”تم ضرور قسطنطنیہ فتح کرلوگے،کیا ہی شاندار وہ امیر ہوگا اور کیا ہی شاندار وہ لشکر ہوگا”۔ قسطنطنیہ چونکہ سلطان کی طرف سے صلح کی پیشکش کے بعد بزور شمشیر فتح ہوا تھا، اس لیے مسلمان ان کلیسا¶ں کو باقی رکھنے کے پابند نہ تھے اور اس بڑے چرچ کے ساتھ جو توہمات اور باطل عقیدے وابستہ تھے انھیں بھی ختم کرنا تھا۔
ا سلئے سلطان محمد فاتح نے اس چرچ کو مسجد میں تبدیل کرنے کا ارادہ کیا، چنانچہ اسے مال کے ذریعہ خریدا گیا، اس میں موجود رسموں اور تصاویر کو مٹا دیا گیا یا چھپا دیا گیا اور محراب قبلہ رخ کر دی گئی، سلطان نے اس کے میناروں میں بھی اضافہ کر دیا تھا۔ اس کے بعد یہ مسجد“جامع آیا صوفیہ”کے نام سے مشہور ہو گئی اور اسے استنبول میں پہلی شاہی مسجد کا درجہ حاصل ہوا جہاں 1517 سے باقاعدہ عثمانی خلیفہ اس کے ممبر سے خطبہ دینے لگے اور سلطنت عثمانیہ کے خاتمہ تک تقریباً پانچ سو سال تک پنجوقتہ نماز ہوتی رہی۔ جنگ عظیم اول کے بعد ترکی کا کنٹرول سنبھال کر مصطفیٰ کمال پاشا نے سلطنت عثمانیہ کے خاتمے کا اعلان کردیا جس پر علامہ اقبال نے کہا کہ ”چاک کردی ترک ناداں نے خلافت کی قبا” وہ سیکیولرزم کی آڑ میں اسلام دشمنی میں اس حد تک آگے نکل گیا کہ اسلامی فرائض تک پر پابندی عائد کردی اور 24 نومبر 1934 کو جب اسے ”اتا ترک” یعنی ترکوں کا باپ کا خطاب ملا تو اسی دن ترک کابینہ نے مسجد آیا صوفیہ کو میوزیم بنانے کی منظوری دیدی۔ اور تقریباً 86 سال بعد ایک بار پھر آیا صوفیہ میں اذان کی گونج سنائی دینے لگی، ترک کونسل آف سٹیٹ کے آیا صوفیہ کی ملکیت سلطان محمد فاتح فاونڈیشن کے حق میں فیصلے کے فوراً بعد طیب اردگان نے خطاب کرتے ہوے آیا صوفیہ کو مسجد کے طور پر بحال کرنے اور 24 جولائی سے باقاعدہ نماز کا اعلان کردیا ہے جس پر اہلیان مغرب کے ساتھ ساتھ سیکیولر حلقوں میں چیخ و پکار مچی ہے جس کی اہم وجہ یہ نہیں کہ آیا صوفیہ کی عمارت کبھی چرچ ہوا کرتی تھی، ایک دو نہیں بیسیوں ایسے چرچ ہیں جن کو امریکہ، برطانیہ و دیگر یورپی ممالک میں مسلمانوں نے خرید کر مسجد بنایا ہوا ہے۔
اصل وجہ یہ ہے کہ جامع آیا صوفیہ اسلامی فتح کی علامت کے طور پر جانی جاتی تھی، صرف اتنا ہی نہیں بلکہ یہ آرتھوڈوکس کرسچنٹی و رومن سلطنت پر ترک عثمانی سلطنت کی مذہبی و فوجی بلکہ ہر لحاظ سے برتری کی علامت ہے اور اس کی بحالی کے اعلان نے ایک بار پھر رومیوں کے زخم ہرے کردئیے ہیں اور مغربی طاقتیں اس موقع سے فائدہ اٹھا کر روس کو کمینزم کی بجائے آرتھوڈوکس کرسچن ریاست کے طور پر بحال کرنا چاہ رہے ہیں یہاں یہ ذکر اہم ہے کہ قسطنطنیہ کی شکست کے بعد بازنطینی اور آرتھوڈوکس مسیحی استنبول سے ماسکو منتقل ہوگئے تھے جہاں ان پر بعد میں کمیونزم کا رنگ چڑھ گیا۔ مغربی میڈیا مسجد آیا صوفیہ کے معاملے کو متنازعہ بنارہا ہے جسے روس نے فیصلے سے پہلے ہی ترکی کا داخلی مسئلہ قرار دیا تھا لیکن مغربی میڈیا کے غیرضروری طور پر اسے اسلامی و مغربی یعنی عیسائیت کی تہذیب کا مسئلہ بناکر پیش کررہا ہے جس پر روسی آرتھوڈوکس پیٹریارک نے اسے تمام کرسچن تہذیب کے لیے خطرہ قرار دیا ہے اور پاپ نے اس فیصلے پر گہرے رنج کا اظہار کیا ہے، اس کے علاوہ تمام دنیائے عیسائیت میں تشویش کی لہر دوڑ گئی ہے کیونکہ آیا صوفیہ کو بطور مسجد کی بحالی کھلا پیغام ہے کہ ترکوں نے کمال اتا ترک کے فلسفے کو دفن کرکے ایک بار پھر عثمانی سلطنت کو بحال کردیا ہے، بہت سے پاکستانی دانشور اسے اردگان کی سیاسی پوائنٹ اسکورنگ قرار دے رہے ہیں جو یقیناً ترکی کے زمینی حقائق سے ناواقف ہیں، کمال اتا ترک کے سیکیولر ایجنڈے کے مسلط ہونے کے باوجود ترکوں کے دل سے مذہبی جذبات و عثمانی خلافت سے والہانہ وابستگی کبھی ختم نہ ہوئی یہی وجہ تھی کہ 1950 میں رپبلکن پارٹی مذہب کے نام پر کامیاب ہوئی اور اس کے بعد 60 کی دہائی میں بھی دائیں بازو کی جماعتوں کو کامیابی ملی، اور اس کے بعد بھی خواہ سلیمان دیمرل ہو یا طیب اردگان ترک عوام نے آیا صوفیہ اور عثمانی سلطنت کے فلسفے کے حق میں ووٹ دیا۔ اور اب آکر ترکوں کی دیرینہ خواہش پوری ہوئی تو اس موقع سے فائدہ اٹھانے کے لیے اسرائیل کے فرمانبردار سپوت لڑکھڑاتا امریکہ و برطانیہ کی جوڑی پس پردہ رہ کر مذہب کارڈ کھیل رہی ہے تاکہ روس سمیت پورے یورپ میں پھر سے طاقت کا محور کلیسا بن جائے تو یہ جوڑی بآسانی اپنے اہداف حاصل کرسکے۔

About ویب ڈیسک

Check Also

اب کشمیر مکمل پاکستان کاحصہ ھے

. بھارت پر ہمیشہ پاکستان کے خلاف جنگی جنون سوار رہتا ہے۔اور اس سلسلے میں …

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے