بھارتی فوج کی ایل او سی پراشتعال انگیزی سے مزید 2 بچے شہید

راولپنڈی: بھارتی فوج نے لائن آف کنٹرول پر دیہی آبادی کو اپنی اشتعال انگیزی کا نشانہ بناتے ہوئے 2 بچوں کو شہید کردیا جب کہ پاک فوج کی موثر جوابی کارروائی میں 3 بھارتی فوجی ہلاک ہوگئے۔ آئی ایس پی آر کے مطابق بھارتی فوج نے لائن آف کنٹرول پر کاکوٹا، شفر، سیریان اور نارا کوٹ کی دیہی آبادی پر مارٹر گولے داغے اور شہریوں کو فائرنگ کا نشانہ بنایا، بھارتی فوج کی جانب سے داغے گئے مارٹر گولے شفر میں سخی کیانی نامی شخص کے گھر پر لگے، بھارتی اشتعال انگیزی سے 2 بچے شہید ہوگئے۔ پاک فوج نے بھی بھارتی اشتعال انگیزی کا موثر اور بھرپور جواب دیتے ہوئے بھارتی چوکیوں کو نشانہ بنایا جس کے نتیجے میں 3 بھارتی فوجیوں کی ہلاکت اور 5 کے زخمی ہونے کی اطلاع ہے۔ واضح رہے کہ بھارتی فوج کی اشتعال انگیزیاں دن بدن بڑھتی جارہی ہیں اور گزشتہ ایک ماہ کے دوران اب تک کئی شہری شہید اور زخمی ہوچکے ہیں۔

بھارت کی طرف سے لائن آف کنٹرول کی مسلسل خلاف ورزیوں‌کا سلسلہ جاری ہے اور اس حوالے سے پاکستان کی طرف سے اقوام متحدہ کی جنرل اسمبلی اجلاس میں‌ بھی آواز اٹھائی گئی تھی. پاکستانی وزیراعظم شاہد خاقان عباسی نے جنرل اسمبلی اجلاس میں‌ بھارتی خلاف ورزیوں‌ پر کھل کر بات کی اور پاکستانی مندوب مدیحہ لودھی نے بھی بھارتی چہرہ بے نقاب کیا تھا.

اس خبر پر اپنی رائے کا اظہار کریں

اپنا تبصرہ بھیجیں